Planungskazu 2022

Di einte pünktlich, die andere eher weniger hämmer eus am Samstigmorge uf de Bahn für de Conconi troffe. Drufabe hämmer eus uf de Weg id Turnhalle gmacht, wo mir de Chrafttest händ dörfe/müesse mache. Und au wänn dMuskle scho einiges hinter sich gha händ, häts natürlich no es ordentlichs Völkturnier gä.
Zum Glück häts nach all dere Ahstrengig
im Lagerhuus en sehr exklusive Zvieri und Znacht geh. S tolle Abigprogramm hend d 05er organisiert. Warm azoge und hoch motiviert simmer loszoge zum no im dunkle Spiili spille. De Priis fürd Siegerteams: Chueche! De Dessert für alli Andere: au Chueche. De Abig isch dänn zwar chli länger gange, als erwartet, aber schlussendlich hemmers dänn doch no alli is Bett gschafft :)

Am Sunntig hät s usgloste Chuchiteam chli früener müse ufstah, dass de Zmorge für alli pünktlich am 8i parat gstande isch. Demit mir vorem Longjog nochli händ chöne verdaue, hämmer en churze Input zum Mentalprogramm gha. Aschlüssend simmer meh oder weniger warm ipackt use in Nebel und hend es Teamfoti gmacht, bevor mer in Grüppli de Longjog grennt sind. Au die grosszügig Verpflegig oder Stärchig unterwegs hät nöd gfehlt. Leider hets nur e beschränkti Azahl Duschene im Pfadihuus gha und drum hämmer eus mitere warme und sehr feine Suppe därfe begnüege. Nach dem wärmende Zmittag hämmer es paar Kaderregle für die nächst Saison zämegstellt, s Huus putzt und eus verabschieded und uf de Heimweg gmacht.

Ladina, Minna, Seline